صْدعتونا بفلسطين صباح وعشيا
خْليوني الله يجازيكم نْرتاح شوييا
تكفيني هْمومي اللي مْثقلا علييا
راني ما بقيت قاد على مسؤولية
صحيح، ديني يْأمرني نخدم القضية
ولكن هذ الناس ما بغاوني ندير مزية
ها دوزيم ها الرباط ها القنوات المغربية
الشطيح والرديح والنشاط ف كل أمسية
ها المهراجانات وموازين الليلية
نشط وفوج هاذي هي العيشة الهْنية
وديها فراسك، ترتاح وتعيش حْياة وردية
بلا صداع بلا مشاكل بلا هموم يومية
أنا عاااارف كلامي كُلو سلبية
ولكن فلسطين ما عندها ما دير بييا
فلسطين بغات رجال بإرادة قوية
يناضلوا ويكافحوا حتى تتحقق الأمنية
فلسطين بغات مبادرات بحال أسطول الحرية
ترفع الحصار وتحرر الأرض من الصهيونية
كلامي واقع أليم يحكي ليكم ما فييا
عافاكوا خدموا فلسطين بوحدكوم.. وتفارقوا علييا
بقلم : أمين الجنان
الجزء الثاني: ولد الحومة 2
ولد الحومة: سلسلة زجلية من 3 حلقات تصور واقع مجموعة من الشباب المغاربة في علاقتهم بقضية فلسطين من خلال حوار بين شابين أحدهما يائس من التغيير والآخر شخص إيجابي، مؤمن بقضيته ويتحرك لأجلها، ولذلك فإنه يحاول إيصال مجموعة من الأفكار لصديقه، كي يغيره ويدفعه إلى أن يكون هو الآخر إيجابيا في المجتمع.
اشكركم 
a3anan alah 3la khidmati 9adiya al oma